اتكلمنا عن المطر....تعالى شوف احنا قلنا ايه

قالنا:البسوا اكياس الزبالة... السودة ديت... عشان تحميكوا من المطرة...وامسكوا المسحات وقوموا بالواجب
كلنا لبسنا اكياس الزبالة ...حتى بصوا
دوت :علاء المحَّار

اما دوت فهو:سعيد النقاش

لكن دوت:الواد كيرلس الكهربائى

بس انا كنت مصاب..وكان صباعى اتعور ..وخر دم.حتى بصواااا
عشان كده..عرضت عليهم انى اشرحلهم المطره بتحصل ازاى..ويخلونى مش اشتغل معاهم
..وهما وافقو.....
انا جيت:الموضوع مخبط شوية يا علاء..بس اوعدك يا اسطى انك تفهمه كله ..بس واحده واحده
كيرلس:مستنى ايه...ابدأ
انا جيت:بص يا اسطى..هشرح حاجة قبل ما نخش فى الموضوع..ممكن...بليييييييييز
علاء المحار:على فكره يا اسطى...اشرح بسرعة..مش لازم تفصل اوى..امال ايه..انا معايا دبلون
انا جيت:انا بقى معايا ربنا..معظم الظواهر الطبيعية اللى بتحصل بسبب حاجة بنسميها
convection الحمل
كيرلس : !!!!!!!!!!!!!!!!!!!!!!!!
انا جيت:هبسطهالك...انت عندك الحرارة بتنتقل من مكان لاخر بطريقة من 3 طرق وهى
1- التوصيل(انك تجيب حاجة سخنة وتوصلها بحاجة برده فتلاقى الحرارة انتقلت من الجسم الساخن للبارد)
2- الاشعاع:انك تحط جسم ساخن فى الهواء الطلق..فيشع حرارة منه ويسخن الهواء اللى حواليه
3- الحمل(وهوه ده بقى اللى قصدى عليه.)وده بقى عشان تفهمه هشرحلك المثال دوت......انت لما بتحط براد الشاى على النار وبتبقى ماليه ميه..تقدر تقولى الميه بتغلى ازاى؟؟؟؟؟؟....جزيئات الميه اللى فى قعر البراد بتسخن..فتقل كثافتها..فتصعد فوق اعلى البراد..وتحل محلها تحت جزيئات ماء باردة..وايضا تسخن وتقل كثافتها وتصعد فوق..وهكذا..وبكده لحد ما كل الميه اللى فى البراد توصل لدرجة الغليان
سعيد:مفهوم كده يا اسطى
انا جيت:على فكره يا اسطى سعيد....الحمل ده بيحصل فى السوائل والغازات...وهما استخدموا فكرة الحمل ديت فى صناعة الثلاجات
كيرلس:هتخبط كده فى الحلل!!!!!!!
انا جيت:كل الثلاجات بتلاقى الفريزر بتاعها فين...فوق طبعا..مش كده..ودوت عشان الهواء البارد اعلى كثافة وبالتالى ينزل يبرد الاكل اللى تحت فى الثلاجة...ويحل محله فوق الهواء الساخن لانه اقل كثافة..ومن ثم يلامس الفريزر البارد فيبرد..فتزيد كثافته..فينزل تحت يبرد الاكل..وهكذااا
علاء:جامدة الحتة ديت..بس ايه علاقة دوت بالمطره..الا بقى لو كانت بتمطر فى الثلاجة
انا جيت:تعالى بقى نتكلم عن الحمل فى الهواء الجوى بتاعنا....لما الهواء اللى مقارب لسطح الارض بيسخن..بتقل كثافته..وبالتالى يصعد لفوق..ويحل محله هواء بارد اعلى كثافة..ولما يسخن هوه الاخر.. بتقل برده كثافته ويصعد لفوق وهكذا
كل احوال الطقس من رطوبة وحرارة وضغط وتكوين للسحب واتجاه وسرعة الرياح..بينتج عن او بيشارك فى حدوثه التحرك الضخم للهواء
سعيد:وايه اللى بيخلى الهواء يتحرك
انا جيت:والله ما انا
علاء:امال مين
انا جيت:بسبب التسخين الغير متساوى لليابسة والماء..ومن غير ما تسأل...اللى بيخل الخلل فى مقدار التسخين هى الاسباب التالية:
1-الزاوية اللى بيها اشعة الشمس بتضرب الارض...لو الاشعة عامودية يبقى الحرارة اللى هتمتصها الارض عالية..وبالتالى هيبقى الجزء دوت اكثر سخونة من الجزء اللى الاشعة سقطت عليه بزاوية تانية غير 90
2-طبيعة سطح اليابسة اللى الاشعة بتضربة..يعنى السطح الخشن هيمتص حرارة اكتر من السطح الاملس ..لان الاملس هيعكس معظم الاشعة اللى ساقطة عليه..ومن ثم هيكون اقل حرارة
3- الارتفاع عن سطح الارض....لان الغلاف الجوى عامل كده...بصوا للصورة ديت
كل ما تبعد عن سطح الارض كل ما الكثافة تقل...والطبقة النحيفة من الهواء اللى هيه اللى فوق ديت بتحجز كمية قليلة اوى من الحرارة...وبالتالى بتبقى درجة الحرارة فوق منخفضة عن درجة الحرارة تحت بالقرب من سطح الارض...وده اخذناه فى المدرسة لما كانوا بيقولولنا ان كل ما نرتفع عن سطح البحر 150 متر كل ما تقل درجة الحرارة واحد درجة مئوية
اما بقى العامل الرابع هوه الليل والنهار...بالليل مفيش شمس..وبالتالى الارض بتفقد الحرارة اللى امتصتها وتبقى باردة...لحد ما ييجى النهار باشعة شمس جديدة..وتسخنها تانى
5- كمية الاتربة فى الهواء...لان كمية الاتربة العالقة فى الجو بتختلف من مكان لاخر
والتغير فى الحرارة دوت هيؤدى الى تغير فى ضغط الهواء من مكان لاخر..مما يجعل الهواء يتحرك من مكان لاخر...وخلى بالكم الهواء بيتحرك من الضغط العالى للضغط المنخفض
كيرلس:يا اسطى فين المطرة يا اسطى فى الموضوع....انت بتلف ليه وتدور
انا جيت:الرطوبة هى عبارة عن بخار الماء فى الهواء.....والسحب والضباب والندى كلهم ناتجين عن تحول بخار الماء دوت الى ماء سائل
علاء:وبخار الماء اللى فى الهواء بيجى كيف؟؟؟
انا جيت:تبخير البحار والمحيطات...او التبخير من على اى سطح رطب...وخلى بالك...اى زيادة فى درجة الحرارة فى اى مكان بيؤدى الى زيادة معدل التبخير فى ذلك المكان...واى زيادة فى معدل التبخير بيؤدى الى زيادة فى كمية بخار الماء فى الهواء المحيط
سعيد:تمام كده
انا جيت:بعد كده فيه عملية تكثيف وعملية ترسيب بيحصلوا....اما عملية التكثيف فهى ان بخار الماء اللى فى الهواء لما بيبرد كفاية..بعض منه بيتكثف ..وهنا يتكون السحب او الندى.
كيرلس:انت تقصد ان السحب هى نتيجة تكثيف بخار الميه اللى فى الهوا
انا جيت:ايوه....العملية التانية اسمها الترسيب..وده بيحصل لبخار الماء اللى اتكثف(السحب).....وفى عملية الترسيب دهيت بنلاقى ان بخار الماء اللى اتكثف دهوت..بيسقط على هيئة امطار
علاء:بووووووووووووووووووووه....بسطهالى
انا جيت:اثقل شوية..بقى..وعمال تقولى معايا دبلون..معايا دبلون...
هقولك قاعدة عامة تبسطلك الدنيا:الهواء كل ما تكون درجة حرارته عالية كل ما تزيد كمية بخار الماء اللى يقدر يحملها جواه...وبالتالى كل ما الهواء ما يبرد كل ما تقل قدرته على حمل بخار الماء وبالتالى يتكثف جزء من بخار الماء ويتحول الى سحب او ندى
كيرلس:كده الدنيا وضحت.
انا جيت:فيه حالة اتزان بين بخار الماء والماء المتكثف...بص للمثال دوت....انت لو جبت كوب وحطيت فيه شوية ثلج..ايه اللى هيحصل على سطح الكوب من بره
سعيد:هتلاقى قطرات ماء على سطح الكوب من بره
انا جيت:ده لان الهواء اللى خارج الكوب لما يلامس سطح الكوب البارد...بيبرد..وبالتالى يتكثف بخار الماء الذى يحتوى عليه ..على هيئة ندى على سطح الكوباية من الخارج
..لكن لو فضيت الكوباية من الثلج....هترجع سطح الكوباية تبقى دافيه تانى..ولما يلامس الهواء الجوى..هيدفى الهوا..وبالتالى يبقى عنده المقدره انه يحمل الندى بعد ما يبخره تانى ويحوله الى بخار ماء مرة اخرى....يعنى من بخار الى سائل ومن سائل الى بخار تبعا لاختلاف درجة الحرارة من البرودة الى السخونة
علاء:هوه ليه لما الهواء الساخن بيصعد الى اعلى بطريقة الحمل اللى قلت عليها ..بيبرد؟؟؟؟؟؟
انا جيت:عشان بيتمدد كل ما يصعد فوق(بص للصورة اللى فوق)..والهواء كل ما يتمدد كل ما تقل درجة حرارته ويبرد...كمان احنا عارفين ان كل ما ترتفع 150 متر ..كل ما تقل درجة الحرارة واحد درجة مئوية
سعيد:والمطر يا اسطى؟؟؟؟؟؟؟؟
انا جيت:طبعا السحاب اللى هوه عبارة عن قطرات صغيرة جداا من الماء...هذه القطرات ما زالت صغيرة كى تترسب وتسقط على هيئة امطار..لذا لكى تسقط على هيئة امطار لابد لها من النمو بشكل كبير لتتحول من الاف الى ملايين الاضعاف من الحجم التى كانت عليه...عندها تترسب تلك القطرات على هيئة امطار
كيرلس:والثلج يا اسطى اللى نزل من كام يوم فى بعض المناطق دوت..ازاى حصل؟؟؟
انا جيت:لما بخار الماء اللى فى الهواء يتكثف عند درجة حرارة اقل من درجة تجمد الماء..بيتحول الى كريستالات من الثلج ..و ديت بتنموا وتنموا كل ما بخار ماء زيادة يتكثف ..لحد ما تتحول الى
snowflakes
اللى هيسقط على هيئة جليد
علاء:اشطى يا اسطى ..كده تمام
انا جيت:كده بقى انا مش هشتغل معاكوا...انا هقعد هنا..وانتو اشتغلو..مش كده
سعيد:قوووووووووووووم....يااااااااااض...بلا كلام فارغ..امسك مسحتك ويلا..انت صدقت ولا ايه

Print This Post