واصل عملك دوماااااااااااااا

واصل عملك دومااااااااااااااااااااااااااااااااا

Wednesday, February 15, 2012

فصل الفضة عن النحاس...او الفضة من الذهب

‎(تكملة الحوار مع عم مصطفى)..(الجزء الثانى)
@بتاع علوم:يعنى انت عاوز تطور من شغلك..وبدل ما تبقى تاجر خردة..تعمل recycling للخردة اللى معاك...
#الاسطى مصطفى:عليك نور....انا معروض عليا نقلة خردة كبيرة لقطع معدنية مكونة من نحاس وفضة...حتى بص العينة ديت..الاطار دوت نحاس..والنقطة اللى فى النص ديت فضة...
@بتاع علوم:وانت ايش عرفك انها فضة...ممكن تكون الومنيوم مثلا؟؟؟؟؟
#الاسطى:يا عم انا عارف..لان اصلا ديت كانت دايرة كهربية...والفضة موصل جيدا جداا للتيار الكهربى ...احسن فى التوصيل من النحاس..عشان كده البقعة اللى فى النص ديت من الفضة..وهيه اللى بيتلحم فيها السلك
@بتاع علوم:طب انا مالى بقى بالحوار ده...عاوز منى ايه...!!!!!!!!!!!!!!
#الاسطى:مهو انت اللى هتقولى ازاى افصل النحاس عن الفضة...وابيع دوت لوحدة كسبيكة من النحاس...ودوت لوحدة كسبيكة من الفضة
@بتاع علوم:والمقابل
#الاسطى:هتاخد نسبتك فى السبوبة ديت ...متقلقش خالص
@بتاع علوم:بص يا اسطى:
فى البداية لازم تجهز ال safety بتاعتك ..هتلبس افارول سميك..وتلبس النظارة اللى بعشرين جنيه...وكمان البس الجوانتى ابو 25 جنيه دهوت..وطبعا الكمامة...تمام
#الاسطى:ليه هوه انا هحارب...!!!!!!!!!!!!!!!!!!!!!!!!!!1
@بتاع علوم:لا. انت مش هتحارب ولا حاجة...انت بس هتتعامل مع درجة حرارة ..هتوصل ل 1000 درجة مئوية...وهتتعامل مع معدن منصهر..وكمان هتتعامل مع غازات سامة...خلى بالك...صحتك اهم ..من السبوبة..مش كده ولا ايه
#الاسطى:ام هند
@بتاع علوم:المهم....عارف طبعا ال crucible ؟؟؟؟؟؟؟
#الاسطى:لا والله ما حصليش الشرف
@بتاع علوم:ديت عبارة عن فنجان صغير كده مصنوع من سيراميك مقاوم للحرارة...وديت بقى هتحط فيها القطعة المعدنية بتاعتك...وبعد كه تحط ال crucible فى الفرن
#الاسطى:فرن ايه..متفقناش على افران
@بتاع علوم:وانا مالى ...المهم تسخن لحد درجة حرارة 970 درجة مئوية
#الاسطى:ام هند..وبعدين
@بتاع علوم:هتسخن الفرن لحد ما توصل درجة الحرارة ل 962 درجة مئوية...وهى درجة انصهار الفضة....واوعى تزود درجة حرارة الفرن عن كده...لان درجة انصهار النحاس حوالى 1083 درجة مئوية..واحنا مش عاوزين النحاس ينصهر
وبكده هتنصهر الفضة فى قاع ال crucible ..ساعتها اقفل الفرن...وافتح باب الفرن بالراحة...لحد ما الهواء الساخن يتشتت بره واحد واحد...عشان ما يهبش فيك..يحرق وشك....وبعد كده افتحه على اخره..وطلع ال crucible بقماشة...واوعى تقربها من جسمك..حطها على تربيزة...وبعد كده صب الفضة المنصهرة فى اى شكل عاوزه للسبيكة بتاعتك..وسيبها لحد ما تبرد....وهيتبقى النحاس صلب فى ال crucible
وبكده يبقى فصلت النحاس عن الفضة
#الاسطى:هوه انا هقعد اظبط حرارة...وممكن ما تطلعش معايا مظبوطة...بقولك ايه..ماتشوفلى طريقة تانية ..فيها كيماويات وكده..احسن ..مش كده
@بتاع علوم:بص يا سيدى
تجيب بيكر فيه حمض النيتريك المركز....وتجيب القطعة المعدنية بتاعتك وتحطها فى البيكر...وتسخن المحلول.....بس ما تسخنش على لهب..واياك تنسى تغطى البيكر
#الاسطى:اغطى البيكر!!!!!!!!!!!!!!!!!!!!!! ..ليه؟؟؟؟
@بتاع علوم:عشان التفاعل هينتج عنه ابخرة بنية محمرة من اكاسيد النيتروجين السامة
Cu + 3 HNO3 = Cu(NO3)3 + NO2 + H2O
المهم:طبعا النحاس والفضة هيذوبوا فى الحمض...وهيبقى لون المحلول بين الازرق والاخضر كده
بعد كده نسيب المحلول يبرد....وبعد ما يبرد نخففه بماء مقطر(يعنى لو استخدمت 75 سم3 من حمض النيتريك....هتحط حوالى 125 سم3 من الماء المقطر)
بعد كده فلتر عشان تشيل اى شوائب غير النحاس والفضة....وهيبقى عندك محلول يحتوى على ايونات النحاس والفضة
#الاسطى:ابقى دلوقتى انك تفصل الايونات ديت عن بعض
@بتاع علوم:تمام...هترسب الفضة على هيئة AgCl بواسطة اضافة ملح الطعام NaCl
...بعد كده هعمل ترشيح وهاخد AgCl .....بس برده هحتاج فرن عشان احط فيه ال AgCl يتحرق ويختزل الى Ag
#الاسطى:طيب والنحاس؟؟؟؟؟
@بتاع علوم:اما بقى المحلول اللى فيه نحاس فده هرسب النحاس عن طريق اضافة H2S وشوية حمض ...حيث يترسب CUS واللى هاخده برده فى الفرن بتسخن..عشان يتصاعد SO2 ويتبقى Cu
وبكده ابقى فصلت النحاس عن الفضة
#الاسطى: طب لو كان ذهب وفضة؟؟؟؟؟؟نفصلهم ازاى؟؟؟
@بتاع علوم:ذهب!!!! اشطى يا اسطى...لعبت معاك يا بتاع علوم.....على كده بقى انا هتبقى نسبتى ..عهتعمل مبلغ حلو..مش كده يا اسطى
#الاسطى:قول يا رب
@بتاع علوم: يا رب...المهم
متعمل نفس الطريقة اللى فاتت...بس خلى بالك..الذهب مش بيذوب فى حمض النيتريك..لذا هيبقى عالق فى المحلول...ولما هترشح هيبقى كده فصلت الذهب عن الفضة...هتقوم بقى مرسب الفضة من المحلول بواسطة على هيئة AgCl زى الطريقة اللى فتت..وتحرقه..فتحصل على Ag
....وفجأه....واحنا فى الاوضة اللى بنتكلم فيها....لاقيت اثنين طالعين من تحت البطانية ..وقالوا فى صوت واحد....(انت غلطااااااااااان)
@بتاع علوم:مين دول يا اسطى؟؟؟؟
#الاسطى: دووول....
@بتاع علوم:استنى يا اسطى ..ما تقولش..البوست اتملى....نكمل بكرة ان شاء الله
Print This Post

3 comments:

  1. شكراً لبتاع العلوم والاسطى وشكر خاص للاسطى لانه بردقلبي وهو كانه يعلم مافي قلبي فسأل الاسئلة التي اردت انا ان اسئلها شكرا جزيلا لكم وبارك الله فيكم

    ReplyDelete
  2. شكرا على المعلومة

    ReplyDelete

My Blog List